శ్రీ ఆర్యాద్విశతి – 5వ భాగము
II భగవాన్ క్రోధభట్టారక విరచిత శ్రీ ఆర్యాద్విశతి – 5వ భాగము II (శ్రీ లలితాస్తవరత్నమ్)
ప్రణుమః స్తత్ర భవానీ
సహచర మీశాన మిన్దుఖణ్డ ధరమ్ I
శృఙ్గార నాయికా
మనుశీలన భాజోఽపి నన్ది భృఙ్గి ముఖాన్ II 81 II
తత్రైణ వహ యోజన
దూరే వన్దే మనోమయం వప్రమ్ I
అఙ్కూర న్మణికక్ష్యా
మ న్తరకక్ష్యాం చ నిర్మలా మనయోః II 82 II
తత్రైవామృతవాపీం
తరళ తరఙ్గావలీఢ తట యుగ్మామ్ I
ముక్తామయ కలహంసీ
ముద్రిత కనకారవిన్ద సౌరభ్యామ్ II 83 II
శక్రోపలమయ భృఙ్గీ
సఙ్గీతో న్మేష ఘోషిత దిగన్తామ్ I
కాఞ్చన మయాఙ్గ విలసత్
కారణ్డవ షణ్డ తాణ్డవ మనోజ్ఞామ్ II 84 II
కురువి న్దాత్మక హల్లక
కోరక సుషమా సమూహ పాటలితామ్ I
కలయే సుధా స్వరూపాం
కన్దళితానన్ద కైరవా మోదామ్ II 85 II
తద్వాపికా న్తరాళే
తరళే మణిపోతసీమ్ని విహరన్తీమ్ I
సిన్దూర పాటలాఙ్గీం
సితకిరణాఙ్కూర కల్పిత వతంసామ్ II 86 II
పర్వేన్దు బిమ్బవదనాం
పల్లవ శోభాధర స్ఫురిత దరహాసామ్ I
కుటిల కబరీం కురఙ్గీ
శిశు నయనాం కుణ్డల స్ఫురిత గణ్డామ్ II 87 II
నికటస్థ పోతనిలయాః
శక్తీః శయ విధృత హేమశృఙ్గి జలైః I
పరిషిఞ్చన్తీం పరిత
స్తారాం తారుణ్య గర్వితాం వన్దే II 88 II
ప్రాగుక్త సఙ్ఖ్య యోజన
దూరే ప్రణమామి బుద్ధిమయ సాలమ్ I
అనయోర న్తర కక్ష్యా
మష్టాపదరూప మేదినీ రుచిరామ్ II 89 II
కాదమ్బరీ నిదానాం
కలయా మ్యానన్ద వాపికాం తత్ర I
శోణాశ్మ నివహ నిర్మిత
సోపాన శ్రేణి శోభమాన తటామ్ II 90 II
మాణిక్య తరణి నిలయాం
మధ్యే తస్యాం మదారుణ కపోలామ్ I
అమృతేశీ త్యభిధానా
మన్తః కలయామి వారుణీం దేవీమ్ II 91 II
సౌవర్ణ కే నిపాతన
హస్తాః సౌన్దర్య గర్వితాదేవ్యః I
తత్పురత స్థితి భాజో
వితర న్త్వస్మాక మాశిషామృద్ధిమ్ II 92 II
తస్య పృషదశ్వ యోజన
దూరేఽహఙ్కార సాల మతి తుఙ్గమ్ I
వన్దే తయోశ్చ మధ్యమ
కక్ష్యాం వలమాన మలయ పవమానామ్ II 93 II
వినుమో విమర్శ వాపీం
విమలాం చ సుధా స్వరూపిణీం తత్ర I
వేలాతిలఙ్ఘి వీచీ
కోలాహల భరిత కూల వనవాటీమ్ II 94 II
తత్రైవ సలిలమధ్యే
తాపిఞ్చదళ ప్రసూన కిరణాభామ్ I
శ్యామల కంచుక లసితాం
శ్యామాం విధుబిమ్బ డమ్బర హరాస్యామ్ II 95 II
ఆభుగ్న మసృణ ఛిల్లీ
హసితాఽ యుగ్మ శర కార్ముక విలాసామ్ I
మన్దస్మితాఞ్చిత ముఖీం
మణిమయ తాటఙ్క మణ్డిత కపోలామ్ II 96 II
కురువిన్ద తరణి నిలయాం
కులాచల స్పర్ధి కుచ నమన్మధ్యామ్ I
కుఙ్కుమ విలిప్త గాత్రాం
కురుకుళ్ళాం మనసి కుర్మహే సతతమ్ II 97 II
తత్సాలోత్తర దేశే
భానుమయం వప్ర మాశ్రయే దీప్రమ్ I
మధ్యం చ విపుల మనయో
ర్మధ్యే విశ్రాన్త మాతపోద్గారమ్ II 98 II
తత్ర కురువిన్ద పీఠే
తామరసీ కనక కర్ణికా ఘటితే I
ఆసీన మమ్బుజాసన
మమ్లాన ప్రసన మాలికా భరణమ్ II 99 II
చక్షుష్మతీ ప్రకాశన
శక్తిచ్ఛాయా సమారచిత కేళిమ్ I
మాణిక్య మకుటరమ్యం
వన్దే మార్తాణ్డ భైరవం హృదయే II 100 II